بعد تشغيل الجمجمة ومحاولة ايجاد اجابات توصلنا للتالى
§ الكهرباء لما بتتقطع بتروح فين؟!
بتروح عند الكهربائى تشترى شوية كهربا وتاجى تانى
§ لو فيه شجرة وقعت على الارض فى الغابه، هل بقية الشجر هيضحكوا عليها؟
هروح بكرة الغابة واشوف وهاجى اقولكم
§ ليه في شارع مراد حاطين يافطه كبيرة مكتوب عليها "ابتسم انت في الجيزة"..، هل الجيزة حاجة تضحَّك؟!
لا مش بتضحك و فى الحالة دى الى يضحك يبقى مجنون رسمى
§ لما تطلب ساندوتش من مطعم وتحب تضيف عليه اى إضافة بيزودوا سعر الساندوتش، طيب ليه لما بتحب تشيل حاجه من محتويات الساندوتش سعره مابيقلش؟
اصحاب المطعم حرامية
§ ليه بيقولوا (الحب أعمى)، ومع ذلك كل أغاني الحب عن (العيون)، نور العين وسحر عينيك وعينيك واحشاني وعينيك كدابين وحبيبي وعينيه أصلاً؟!
مين الى بيقولوا , يقولوا الى هما عايزينة واحنا مالنا
§ لو إسمك (ماجد) وطلعت طيّار، هتفضل مستحمل قد ايه الناس وهيا بتندهلك (كابتن ماجد)؟
هستحملهم طول العمر نصيبى كدة بقى
§ الأخرس بيكلم نفسه إزاى؟
اكيد على الموبايل يعنى هيكلمها ازاى
§ ليه بيقولوا على الشخص اللى نايم بعمق إنه نايم زى البيبيهات؟، مع إن البيبيهات أصلا بيصحوا كل نص ساعة!
مش عارف والله
§ معروف إن (اللي يتلسع من الشوربة ينفخ في الزبادى)، بس.. هل لو (نفخت في الزبادى) يبقى دا معناه إني (إتلسعت من الشوربة)؟!
لا العكس غير صحيح
§ ليه البنات بتفتح بقها وهيا بتحط (ماسكرا) ؟
اسال البنات وانا مالى
§ إزاي لما اسأل عن مقر النادي الأهلي فين، الاقي الإجابة.. النادى الأهلى في الزمالك؟!
اكيد الى اداك العنوان بتاع المقر ادهولك غلط علشان هوا زملكاوى انا عارف الناس دى كويس
§ ليه لو واحد قال قدامي كلمة "الأقصر" بتيجي في دماغي على طول صورة "الآثار"؟! مع إنى لو قال قدامي كلمة "الآثار" مش شرط تيجي في دماغي صورة "الأقصر"؟!
يبقى دماغك بتفكر غلط والغلط راكبها مس هاسها لراسها ايوة الحق ميزعلش
§ ليه الناس مابتقولش (الرياضة فايز ومهزوم) غير لمّا تتغلب؟
معرفش اسال الناس دى حاجة غريبة اوى
§ ليه الشامبو بيبقى بالخوخ الطبيعى بينما عصير الخوخ بيبقى معمول بنكهة الخوخ؟
علشان الشامبو للشعر بس العصير للبشر
الى احسن الشعر ولا الــ البنى ادمين الشعر طبعا
§ ليه اللي سايق عربية ومشغل الكاسيت أو الراديو.. أول ما يدخل شارع ضلمة يروح موطى الصوت فوراً؟!
خايف من العفاريت او خايف من الحرامية
§ ازاى تقدر تعرف المسند بتاع كرسيك فى السينما؟
الجو بيكون ضلمة اقعد فى كرسى واى مسند مش فارقة هوا حد شايف حاجة
§ ليه بيقولوا في الأخبار، مصرع 9 في فلسطين، ومصرع 50 في بغداد، ومصرع 85 في زلزال، ومصرع 112 في سقوط طائرة؟! طيب ما يقولوا على طول مصرع 250 واحد في نشرة أخبار التاسعة!
اصلهم فى التلفزيون مش بيعرفوا يجمعوا كويس فخايفين يغلطوا ادام الناس
§ ليه لمّا الواحد يكون واقف مستنى الأسانسير بعد ما داس على الزرار اللي بيستدعى الأسانسير وبقى منور وباين إنه منوّر، ييجي واحد تاني بعد ثواني يبص لك ويبص للزرار المنور ويروح دايس على الزرار تاني؟!
معندوش نظر هيكون اية يعنى
§ لما تيجي تتصل بواحد.. ليه الأرقام اللي بترد غلط.. ما بتكونش مشغولة ؟
حظك بيبقى وحش
§ لو كانت الأرض كرة – زى ما بيقولوا – طيب الماتش هيبدأ إمتى؟!
كمان نص ساعة
§ ليه هيفاء وهبى بتقول "أنا بردانة أح"، مع إن "أح" تقال للحاجه السخنة، يعني المفروض تقول "أنا بردانه "بررررررر".
معرفش انا هبقى اكلمها واشوف الموضوع دة متقلقوش يجب ان نضع حد فاصل لهذا الامر
§ إذا كان – زى ما بيقولوا – الدنيا مسرح كبير، طيب أنا بامثّل ولاّ باتفرج؟! وإذا كنت من المتفرجين، طيب هم المتفرجين بيقعدوا فين؟!
سعات كدة وسعات كدة , بيقعودا فى الصالة
§ ليه بيكلبشوا العربية اللي واقفة صف تاني وقافله الشارع.. مع إن الشارع بعد الكلبشة بيفضل مقفول برضه؟!
علشان يعملوا زحمة والعربية متمشيش رخامة بقى واحنا مالنا
§ لو الصاعقة نزلت على حد بيموت متكهرب فورا، طيب لمّا الصاعقة بتضرب البحر، ليه السمك اللى فى البحر مابيموتش متكهرب؟
اصلهم لابسين لبس ضد الكهربا
§ لمّا الواحد بيعلّى صوت الكاسيت، هل ده بيسحب كهرباء أكتر؟
ايوة طبعا امال ببلاش ولا اية
§ لو البوليس وهو رايح يقبض على حد شاف فى السكة جريمة بتحصل ، بيمنعها ولاّ بيركز فى المهمة اللى طالع علشانها؟
لا بيمنعها
§ هل الحيوانات بتعطس؟
ايوة بتعطس
§ طيب هل حصل فعلا فى يوم من الايام أن فيه واحد (ضرب عصفورين بحجر)؟
اه بس كان بيحلم
§ ليه لما يكون الواحد جوه عربية والعربية داخلة هتعدى من نفق؟؟ تلاقى الواحد يوطى رأسه كإنه هو شخصياً اللي هيعدى من النفق مش العربية؟!
معرفش والله هبقى هعدى من تحت نقش واشوف الموضوع دة
§ ليه لما باكون في البيت واتصل بالسوبر ماركت (اسمه سوبرماركت ريشه) وأقول (آلو.. سوبرماركت ريشه؟!) يرد على يقول لي (إن شاء الله)؟! يعني (إن شاء الله سوبرماركت ريشه؟!) ولاّ (إن شاء الله مش سوبرماركت ريشه؟!).
ان شاء الله هوا السوبر ماركت
§ ليه لما تسأل واحد على العنوان وتقول له "شارع كذا فين؟!" يرد عليك بسؤال "هما قالوالك فين؟!". طيب ما هما لو كانوا قالوا لي ماكنتش سألتك، ثم هما مين اللي قالوا لي؟!
الناس
§ ليه الناس في الشارع بتستخدم أدوات نداء لتوقيف أي شخص، أدوات نداء مالهاش أصل في اللغة و ينفع تنادي بيها على أحد في المطلق زى. بسست، والنبى يا، ويا كابتن، وباقولك وخُد يا، وأيوه يا، وليه أدوات النداء دي بتوقف الشخص المقصود بالذات؟!
دى لغة عامة الناس خدت عليها وفهموها كدة
§ بيقولوا (لكل قاعدة استثناء)..طيب ايه الأستثناء بتاع القاعدة دى؟
لو انت بتنده لبنت هتقول لو سمحت يا قمر هههههه
§ ليه لما حد يحب يدي يدى معلومة بيبدأ الجملة بكلمة (بيقولك)، (بيقولك العربيات رخصت)!
علشان لو الكلام غلط هوا ملوش دعوة دول هما الى بيقولوا
§ ليه فيه ناس لما تعدى عليها وتقول (سلامو عليكوا) ما تسمعش منهم غير صوت بيقول "وع.. س س.. هه"؟!
اصلهم مش فاضيين يردوا كل الكلام
§ ليه المذيعة دايما بتتمنى لنا وقت ممتع مع الفيلم العربي اللي بيتذاع للمرة الألفين.. وهى عارفة كده كويس؟!
مذيعة دمها تقيل بتستخف دمها هنعمل اية طيب
§ طيب ليه المذيعة بتقول أعزائي أفراد الأسرة.. وهى ما تعرفش حد فينا؟!
ما انا قولت لكم دمها تقيل قصدى خفيف
§ ليه الشخص اللي يسألك "الساعة كام" لازم يرفع لك دراعه الشمال ويشاور على مكان الساعة بصباعه "لو سمحت الساعة كام"....طيب اللى بيسأل على مكان الحمام المفروض يشاور على ايه؟
على مكان الحمام فى اخر البيت جنب الاوضة
§ اللى مايقدرش يتكلم اخرس، واللى مايقدرش يشوف اعمى، طيب اللى مايقدرش يشم أيه؟
مزكم عندة زكام
§ طيب ليه اللي يسألني عن الساعة لازم يحلفني "الساعة كام والنبي؟!".
علشان متضحكش علية وتقولها غلط
§ ليه لما تقول لواحد حاجة ومايسمعهاش كويس تلاقيه هو اللي علاّ صوته فجأة (بتقول ايه؟!).
علشان ينرفزك وتقولة بتزعا لية
§ ليه الكتابة على التي شيرت لازم تكون بالإنجليزي، ليه ماحدش بيكتب على التي شيرت بتاعته بالعربي.. مثلاً "اللي ذاكر ذاكر خلاص".
اصل التيشرتات بتتعمل فى الخارج بالانجليزى عالطول واحنا نترجم بقى
§ ليه الواحد ما يشربش إزازتين "مزيل دهون" علشان يخس؟!
اصلها غالية وطعمها وحش
§ اذا كان زيت الذرة معمول من الذرة ، و زيت عباد الشمس معمول من زهرة عباد الشمس، طيب الbaby oil معمول من ايه؟
من الkakبتاع البيبى
§ لو " رُكب" الإنسان كانوا ورا مش قدام، كانت الكراسى هيبقى شكلها ايه؟
زى الكراسى دلوقتى بس من غير مسند
§ ليه الواحد بيدوس على الريموت كنترول بقوة وعنف لما الحجارة بتشطّب؟
علشان يبوظ الريمود
§ التوأم الملتصق لما بيدخل السينما ، بيقطعوا تذكرة واحده ولا تذكرتين؟
على حسب صاحب السينما ممكن يكون نتن ياخد تزكرتين
§ ليه الكبار بيطلع لهم شعر فى ودانهم؟
علشان يخوفوا العيال الصغيرة بية
§ لمّا البوليس بيهجم على شقة ويكسّر الباب، مين المسئول إنه يصلّح الباب ده؟
النجار
§ لو واحد مات و رجله متجبسه ،هل بيدفنوه بيها متجبسة ولاّ بيشيلوا الجبس:' كفاية كدة :؛
لا يشيلو الجبس علشان يدفن براحتة كدة
اخيررررررررررررررا خلصت اما نشوف نتيجة الامتحان
انا كدة ضربت الرقم القياسى فى الرخامة وتقل الدم والنرفزة صح ؟؟
بزمتك مين الارخم انا ولا الاسئلة
انا طبعا وبجدارة
ربنا يستر ومتطردش برة المنتدى
موضوع: أسئله مستفزه ،، بس جامده 
الثلاثاء 08 سبتمبر 2009, 12:22 am
